Shtetet e Bashkuara të Amerikës dhe Bashkimi Evropian kanë nënshkruar një memorandum mirëkuptimi për bashkëpunim në prodhimin dhe sigurinë e furnizimit me minerale kritike.
Marrëveshja u firmos nga sekretari amerikan i Shtetit, Marco Rubio, dhe komisioneri i Tregtisë i BE-së, Maroš Šefčovič, duke sinjalizuar një thellim të bashkëpunimit mes dy palëve në një sektor strategjik për ekonominë globale.
Shtetet e Bashkuara synojnë të sigurojnë akses më të madh në rezervat e mineraleve kritike, veçanërisht në zinxhirët e furnizimit të elementeve të rralla, të cilët aktualisht dominohen nga kompani kineze.
Edhe pse Rubio nuk e përmendi drejtpërdrejt Kinën, ai theksoi se marrëveshja paraprake me Brukselin pasqyron një ndërgjegjësim në rritje mes aleatëve perëndimorë për rëndësinë e zinxhirëve të furnizimit dhe mineraleve kritike për suksesin ekonomik.
“Përqendrimi i tepërt i këtyre burimeve, fakti që ato dominohen nga një ose dy aktorë, përbën një rrezik të papranueshëm. Ne kemi nevojë për më shumë diversifikim në zinxhirët e furnizimit”, deklaroi ai para nënshkrimit të memorandumit.
