Izraeli lëshon një akuzë të rëndë në drejtim të Organizatës së Kombeve të Bashkuara. Tel Avivi pretendon se ka prova që mes militantëve të Hamas që kryen sulmin vdekjeprurës të 7 tetorit në shtetin hebre, morën pjesë edhe punonjës të organizatës së OKB për refugjatët palestinezë në Gaza.
Këtë e raporton radio ushtarake, që citon burime nga shërbimi i brendshëm i sigurisë në Izrael. Ky informacion publikohet në një kohë kur Sekretari i Shtetit Amerikan, Antony Blinken, zhvillon turin e tij në Lindjen e Mesme në tentativë për të zgjidhur krizën që deri më tani u ka marrë jetën mbi 23 300 palestinezëve dhe 1200 izraelitëve.
Blinken pranoi se bilanci i viktimave në luftën në Gaza është tepër i lartë, veçanërisht ndër civilë gra dhe fëmijë. Megjithatë Shtëpia e Bardhë konfirmoi qëndrimin se Amerika nuk mbështet një armëpushim mes Izraelit dhe Hamas. Blinken në takimin me kryeministrin Benjamin Netanjahu, i tregoi se shumë vende të rajonit, por edhe të botës, dëshirojnë të investojnë në rindërtimin e Gazës dhe të mbështesin një pakt për ndërtimin e një shtetit të Palestinës. Diçka që kundërshtohet ashpër nga Tel Avivi.
Në Lindjen e Mesme, sekretari amerikan i shtetit është takuar edhe me presidentin palestinez, Mahmoud Abbas, me të cilin diskutoi gjithashtu për mundësinë e krijimit të një shteti palestinez. Ndërkohë, vizita e Blinken në Bregun Perëndimor dhe Izrael është konsideruar nga Hamas një tregues i qartë i përfshirjes së Shteteve të Bashkuara në krimet e luftës në Gaza.
“Qëllimi i vizitës është mbështetja e pushtimit. Nuk ka dallim mes izraelitëve dhe amerikanëve”, u shpreh një zyrtar i lartë i Hamas, që citohet nga mediat ndërkombëtare.
