Në një kohë kur moti i keq DANA është tashmë në zona të Andaluzisë , një vend që tashmë i përket kontekstit të “alarmit të kuq” që nga mëngjesi i së mërkurës (13/11), përsëri në provincën e Valencias numri i të vdekurve vazhdon të rritet. .
Janë gjetur trupat e dy djemve të rinj të zhdukur prej dy javësh, siç bëjnë të ditur mbrojtja civile, duke konfirmuar frikën se numri i viktimave do të rritet në mënyrë dramatike dita-ditës.
Ata janë Ruben dhe Izan Matias Kalatayoud, përkatësisht tre dhe pesë vjeç. Trupat e tyre të pajetë u gjetën në vende të ndara pranë qytetit të Cataroja, pothuajse 10 kilometra nga shtëpia e tyre e vendosur në periferinë Valenciane të Torrent. Aty ku u humbën gjurmët kur ndodhën përmbytjet më 29 tetor.
Sipas deklaratave të një të afërmi të dy djemve fatkeq për rrjetin televiziv shtetëror të Spanjës (TVE), nëna e tyre ishte duke punuar në Valencia dhe babai i tyre ishte me fëmijët në shtëpi kur përmbytja ndodhi në orën 18:30 klithmat në rrugë i tmerruan fëmijët dhe babai i tyre i futi në dhomën e ndenjjes për t’i qetësuar, por uji hyri nëpër mure në shtëpi dhe të tre u fshinë.
Babai i tyre, emri i të cilit nuk bëhet i ditur, u përpoq t’i mbante pranë tij, por dështoi, raportoi agjencia shtetërore e lajmeve EFE. Ai mbijetoi pasi arriti të varej në një pemë dhe qëndroi atje për katër orë derisa moti ekstrem ndaloi.
Ekipet e shpëtimit që vazhdojnë të kërkojnë për personat e zhdukur, kanë intensifikuar përpjekjet e tyre në përrenjtë e afërt dhe në ligatinat Albufera, duke përdorur gjithashtu mjete të posaçme kërkimi detar.
Deri dje autoritetet kishin konfirmuar vdekjen e 223 personave, ndërsa 17 persona janë ende të zhdukur.
Tani, frika e përsëritjes së fenomenit dhe fatkeqësive është transferuar përgjatë bregdetit spanjoll dhe veçanërisht në Malaga dhe zonën jugore. Shërbimet e urgjencës larguan banorët nga shtëpitë e tyre përpara rrezikut dhe u kërkuan qytetarëve të lëviznin në një lartësi sa më të lartë që të mundeshin
