Partitë kryesore politike në Kosovë nuk kanë bërë ende hapa konkretë drejt arritjes së një marrëveshjeje për zgjedhjen e presidentit të ri, edhe pse tashmë ka nisur të rrjedhë afati i vendosur nga Gjykata Kushtetuese e Kosovës.
Javën e kaluar, Kushtetuesja u dha ligjvënësve 34 ditë kohë për zgjedhjen e kreut të shtetit, duke paralajmëruar se në të kundërtën vendi do të shkojë në zgjedhje të parakohshme brenda 45 ditësh.
Mandati i presidentes aktuale, Vjosa Osmani, përfundon më 4 prill, ndërsa afati i fundit për zgjedhjen e pasuesit të saj është caktuar më 28 prill. Megjithatë, një javë pas vendimit të gjykatës, nuk janë parë përpjekje publike për arritjen e një konsensusi politik.
Burime nga dy partitë më të mëdha opozitare, Partia Demokratike e Kosovës dhe Lidhja Demokratike e Kosovës, kanë bërë të ditur se nuk kanë marrë ende ftesë për takim nga kryeministri Albin Kurti, njëkohësisht lider i Lëvizja Vetëvendosje.
Nga PDK-ja kanë njoftuar se janë në proces të organizimit të mbledhjes së Këshillit Drejtues, ku pritet të përcaktohen qëndrimet zyrtare të partisë për zhvillimet e fundit politike.
Ndërkohë, dy ditë më parë, kryeministri Kurti paralajmëroi se do të ftojë liderët e partive politike për diskutime, por pa dhënë një afat të saktë kohor. Situata mbetet e paqartë, ndërsa afatet kushtetuese vazhdojnë të afrohen.
