Presidenti amerikan Donald Trump ka sinjalizuar se Uashingtoni po shqyrton hapat e ardhshëm në konfliktin me Iranin, duke thënë se ndodhet në një “fazë vendimmarrjeje” dhe se “gjëra shumë të rëndësishme po vijnë”.
Duke folur me një korrespondent të Fox News për çështjet e jashtme, Trump nuk bëri të ditur se çfarë vendimi mund të marrë administrata e tij, por përdori një gjuhë të ashpër ndaj Teheranit. Sipas raportimeve, ai tha se autoritetet iraniane “bëjnë mirë të sillen mirë”, ndërsa përmendi edhe mundësinë e një reagimi ushtarak shumë të fortë nëse situata e kërkon.
Megjithatë, presidenti amerikan nuk e përjashtoi rrugën diplomatike. Trump deklaroi se është i gatshëm të takohet me presidentin iranian Masoud Pezeshkian.
Sipas Fox News, Irani i ka dërguar Uashingtonit, përmes Katarit, një listë kërkesash për t’i dhënë fund konfliktit. Kushtet po shqyrtohen nga administrata amerikane, por ende nuk është bërë e ditur nëse ato mund të krijojnë bazën për një marrëveshje.
Një takim i mundshëm mes Trump dhe Pezeshkian mund të zhvillohet në një moment kur të dy pritet të ndodhen në Nju Jork për Asamblenë e Përgjithshme të Kombeve të Bashkuara. SHBA-të kanë miratuar vizat për presidentin iranian dhe zyrtarë të tjerë të lartë të Teheranit që do të marrin pjesë në aktivitetet e OKB-së.
Në të njëjtën kohë, tensionet mes dy vendeve vazhdojnë të jenë të larta. Irani ka paralajmëruar SHBA-të dhe aleatët e tyre të mos ndërmarrin sulme të reja, duke deklaruar se çdo veprim i tillë do të marrë kundërpërgjigje.
