Makinat elektrike: pse prodhim në Indi dhe jo Evropë?

Gjiganti shumëkombësh i makinave Stellantis ka arritur në përfundimin se aktualisht nuk mund të prodhojë automjete elektrike të përballueshme në Evropë dhe po kërkon vende prodhimi më të lira si India, tha një ekzekutiv.

Nëse India, me bazën e saj të furnizuesve me kosto të ulët, përmbush objektivat e cilësisë dhe kostos së Stellantis deri në fund të vitit të ardhshëm, ajo mund të hapë derën për eksportimin e automjeteve elektrike në tregje të tjera, tha Carlos Tavares.

Stellantis prodhon marka të tilla si Fiat, Chrysler, Peugeot dhe Opel.

“Evropa nuk mund të prodhojë ende automjete elektrike të përballueshme. Kështu që mund të ketë një mundësi të madhe për Indinë në formën e shitjes së makinave elektrike të pasagjerëve me një çmim të përballueshëm duke mbrojtur përfitimin,” u tha Tavares gazetarëve në një tryezë të rrumbullakët në Indi, raportoi Reuters.

Stellantis investon shumë në automjete elektrike dhe planifikon të prodhojë dhjetëra modele në dhjetë vitet e ardhshme, por Tavares paralajmëroi në tetor se do të duhen pesë deri në gjashtë vjet të tjera për të prodhuar automjete elektrike të përballueshme me bateri.

A mund të bëhet India një prodhues i madh?

Në vizitën e tij të parë në Indi pas marrjes së detyrës si CEO i Stellantis, Tavares tha se kompania është ende duke punuar në një plan për të eksportuar automjete elektrike nga gjigandi aziatik dhe nuk ka marrë ende asnjë vendim.

Vizita e tij përkoi me hyrjen e prodhuesve kinezë të automjeteve elektrike në tregun evropian. Synimi i tyre është të fitojnë konsumatorët me makina më të përballueshme që tashmë kanë kaluar shumicën e konkurrentëve të huaj në Kinë, tregu më i madh në botë për automjetet elektrike.

“Ka një tension në marrëdhëniet mes Kinës dhe botës perëndimore që është bërë gjithnjë e më i theksuar kohët e fundit. Kjo do të ketë pasoja në biznes dhe India është padyshim vendi në pozitën më të mirë për të përfituar nga kjo mundësi”, tha kreu i prodhuesit shumëkombësh të makinave.

Stellantis tashmë prodhon motorë elektrikë dhe bateri, dhe planifikon të prodhojë edhe qeliza baterish. Tavares gjithashtu dëshiron të marrë komponentë për automjetet elektrike, duke përfshirë bateritë, nga furnizuesit vendas në Indi për të konkurruar në kosto dhe çmim.

“Sot problemi i automjeteve elektrike është kryesisht çmimi, jo teknologjia”, theksoi ai. /tesheshi.com/

Leave a Reply

Your email address will not be published. Required fields are marked *

15 + 4 =