Gazetaria kërkon qytetari dhe… qytetar

Nga Anri Bala

E vërteta, nuk është më mjet i gazetarëve, sepse shumëkush e ka shkatërruar atë, një herë duke sharë e hedhur vrerë me akuza për këdo pa asnjë filtër, një herë tjetër duke mos treguar kurrë një dokument, apo duke mos nxjerr kurrë asnjë fakt. E vërteta duket si një “gënjeshtër”… njësoj si era, që nuk shihet por ndihet.

E kujt i intereson më shume kjo, medias…?! Absolutisht që jo! Më shumë i intereson politikës kleptomane dhe padrejtësisë, e cila ka krijuar postulat çmendurakësh: Të shpifësh, të mos thuash të vërtetën, e mos ta gjesh atë kurrë… është më se normale.

Hajdut, vrasës, kriminel… kjo nuk është gjuha e medias, por gjuha e politikanëve tanë që kurrë nuk bënë drejtësi, as për moralin e tyre, edhe atëherë kur drejtësinë e kanë ne dorë.

A e dini pse? Sepse u intereson të baltosin veten, për tu treguar të tjerëve se mund t’i u baltosim fare lehtë edhe ju… për ta kthyer në formë komunikimi shpifjen dhe gënjeshtrën, për tas përdorur si mburojë për politikanin e korruptuar dhe zbehur të vërtetën në çdo kohë, në mënyrë që e pavërteta të jetë normalitet!

Kemi dëgjuar me dhjetëra epitete në 30 vite, por më së shumti kemi mësuar se brenda sallës së Parlamentit kemi pasur shumë hajdutë, trafikantë dhe kriminel, e disa vrasës… që hynin e dilnin si zotërinj me kostum, puro, dorashka e kravat, por duarët pak pis dhe askush nuk i shikonte dhe asnjë nga ky takëm nuk doli prej andej me pranga në duar!

Pra të jesh hajdut sot është normale, sepse e dëgjon nga gjithkush, por askush nuk guxon të thotë se kush është hajduti?! Ai i vërteti me zë figurë, që në shpinë mban thesin e hajdutërisë si plaçkë fitoreje, apo ai që vjedhjen e ka mjeshtri, sepse edhe di ta fsheh mirë thesin.

Mirëpo të jesh gënjeshtar, shpifës, zagar i politikës që të ushqen me thërrimet që ngelin pas gostisë së saj, nuk quhet as gazetari, as informim, por paftyrësi deri në pushtllik, për sterrosjen e turpshme të pushtetit të katërt.

Këta llojë “telendarësh” as nuk rrihen e as nuk vriten… por trajtohen si heronj, vetëm se janë të zot të shiten e blihen, për të heshtur, gradohen për shërbime dhe majmen e pasurohen, si avokat të djallit… me motorin e dizinformimit. Lukunia e tyre është aq e madhe, saqë nuk ka gjahtarë e nishantarë që e shkatërron, duke krijuar një moçal me një pikë uji… i mbushur me mbeturina.

Kjo na detyron që të thërrasim dhe t’i drejtohemi kujtdo që nuk trembet e guxon, që të vërtetës mos t’i vendos fre… të bashkohet me fjalën e lirë, por jo të nxirë nga shpifësit dhe lehësit, që kanë nxirë edhe atë më të panxirën… frymën e fjalosjes.

Madje heshtjen kanë për borxh t’ua blejnë me flori, sepse fjala është shumë herë më e shtrenjtë dhe sa do të kamur të jenë ata, nuk munden ta blejnë kurrë me çmimin e lirisë.

Ata do mundohen tu ofrojnë “botën”… atë të tyren qytetarëve, për t’i neveritur, sepse qytetaria i perket një tjetër bote, ku nuk ekzistojnë puthadorët dhe putha… ç’tu dal përpara.

Ndaj mos heshtni, sepse ne jemi shumë pak pa ju dhe shpifja e mashtrimi do të lulëzoi… deri kur ne të gjithë, pa dallim race, krahine, apo ideje, të mos heqim drynin e së vërtetës së kyçur në gojë!

Alarm në Ditën Botërore të Lirisë së Shtypit./Ekskluzive.al

Leave a Reply

Your email address will not be published.

3 × five =