Koncerti i ufologut fashist dhe urrejtje ndjellës

Editorial
290
0
sample-ad

Nga Gazmend Kapllani

Dje në Selanik të Greqisë, nacionalistë të majtë e të djathtë, rrahën kryetarin e bashkisë së qytetit Janis Butaris. Një burrë i mençur dhe trim që prej vitesh tashmë i kundërvihet nacionalizmit histerik me të cilin është mbruajtur shoqëria greke – që nga krijimi i shtetit modern grek.

Butari është mbi të gjitha një simbol që urrehet nga Kisha Ortodokse Greke, fashistët, stalinistët, kopukët, hajdutët, shteti i thellë grek. Përse e urrejnë? Sepse thotë disa të vërteta të thjeshta, si për shembull, flet për holokaustin e hebrejve të Selanikut (një qytet, universiteti i të cilit është ndërtuar mbi varrezat e hebrejve të qytetit!); flet për të kaluarën e një qyteti, Selanikut, që dikur ishte një nga qytetet më kozmopolite në Mesdhe dhe që vala e nacionalizmit dhe spastrimeve etnike e ka kthyer në një provincë ku mbizotëron fjala e talibanëve ortodokse dhe e paranojës nacionaliste.

Por unë për tjetër gjë doja të shkruaja. Kur isha në Tiranë, javën e kaluar, pashë afishe të një koncerti që do jepet në Tiranë në datën 24 maj, të një këngëtari grek quajtur Notis Sfakianakis; Notis këndon tallava greke, të quajtur në greqisht edhe “muzikë skiladhiko”, ose në shqip “muzikë qençe” apo “muzikë hum-hum”. Nejse, në një shoqëri të hapur njerëzit janë të lirë të dëgjojnë dhe të adhurojnë edhe muzikën hum-hum.

Problemi është se Sfakianakis është nje fashist i hapur, i cili i ka quajtur shqiptarët “plehra”, që jep koncerte për nazistët e Agimit të Artë dhe nxit urrejtjen dhe paranojën nacionaliste në Greqi (përveç faktit që është një ufolog që beson se grekët janë racë aq superiore saqë e kanë prejardhjen nga jashtë-tokësorët!).

Më bëri përshtypje që ata që Sfakianakis i quan “plehra” do paguajnë 100 apo 200 euro për biletë që ta degjojnë, ndërsa ne Greqi biletat për koncertet e tij nuk i kalojnë zakonisht 50 euro. Sigurisht, me aq shumë pare të pistë që qarkullon në Shqipëri, shumë “plehra”, mendoj, s’i kanë për gjë 200 euro për një natë.

Por ajo që të shokon në rastin e atdheut tonë ende-geto është se ne nuk adhurojmë dhe respektojmë vetëm anët më të këqija të vetvetes, por edhe anët më të këqija të të tjerëve.

Koncerti i këtij ufologu fashist dhe urrejtje-ndjellës nuk është vetëm ofendim i rëndë për shqiptarët. Është ofendim i rëndë edhe për njerëzit demokratë në Greqi dhe kudo në Ballkan dhe Europë.

Facebook Comments

POST A COMMENT.

fourteen + nine =